Рубаилер
***
Жакындатпайм шарап жытын мурунга,
Жакындабайм өзүм да ошол зулумга.
Терс жактарын айтып бүтүү узун кеп,
Пайдасы анын арзыбайт бир тыйынга.
***
О дүйнөгө ой жүгүртсөм алсырап,
Бейиш менен тозок бар деп айтылат.
Кээ бир кылган күнөөлөрүм эстесем,
Тозок көзгө тасма болуп тартылат.
***
Ааламына сүңгүп барып кыялдын,
Адаммын деп айтуудан да уялдым.
Анткени мен адамдарга пайдалуу,
Айтууга арзыр кандай эмгек кыла алдым?
***
Биз өмүргө бир гана ирет келебиз,
Өтүп мезгил бекийт чымга денебиз.
Жер жүзүнө батпай калсак керек ээ,
Келип анан кетпес болсок эгер биз?
***
Бир кишини кеп-сөз кылып олтурдук,
Көңүлдөрдү өкүнүчтү толтурдук.
Ооруп жаткан энесине карабай,
Кайын журтка тойго кетти, ой, шумдук!
