Доорлорго киргим келет
Элди сүйгөн, жерди сүйгөн көкүрөк,
Анын отун кайсы жамгыр өчүрөт.
Акын сөзүн шамал ташып кылымдап,
Жүрөктөрдөн жүрөктөргө көчүрөт.
Тоо-таш басып, чөлдү кезип, кыр менен,
Сен, адамзат, жол жүрүпсүң миңдеген.
Шаарларга кербен кирип келгендей,
Доорлорго киргим келет ыр менен...
Ыр мурас
Ыр таптым, бирок дүйнө таба албадым,
Ыр тапкан көңүлүмдү тана албадым.
Көз жеткен бийиктикке кол сунбадым,
А жеткен бийигимде кала албадым.
Ыр таптым, бирок байлык таба албадым,
Ыр тапкан тагдырымды тана албадым.
Шамалдай, күндөй, суудай өмүр сүрүп,
Ыры жок сарайларга камалбадым.
Алыскы айылдагы бала кезден,
Мен өткөн ашуулардан, Алабелден.
Калтырар мурасым да ырым болмок,
Ырым бул досум сага ала келген.
