Биздин милдет
Жолдош күттүм, жолун таза сактадым,
Жан кейитер жаман бир сөз айтпадым.
Бирөө мага уялаштай жуурулуп,
Бирөө менден алыстады ат чабым.
Жолдош күттүм, жолун туура сактадым,
Антсе дагы айрымына жакпадым.
Жакындоону милдетим деп түшүнүп,
Алычтоонун түк себебин таппадым.
Жолдоштуктун ачык болсун көңүлү,
Жолдоштуктун узак болсун өмүрү.
Анык достук кыйын кезде тик туруп,
Ак пейилден алча болуп төгүлүү.
Жолдоштук не? Адалдыкка дит буруу,
Жонду салбай жокко, барга тик туруу.
Андай болбой, күнүмдүккө тон бычса,
Жарма дос деп эсептеңиз сиз муну.
Жолдоштук не? Заряддалуу, тартылуу,
Жолу татаал, максаты зор, салты улуу.
Биздин милдет – ушул ыйык байлыкты,
Муундардан муундарга калтыруу!..
