Ойчул акын
Ар бир доордун акындары ар башка,
Түшөт алар дүнүйөлүк кармашка.
Күн карама кээ бир акын сөрөйдү
Күндөн бийик акынга сен алмашпа.
Ойго терең, олуя акын бир келет,
Оош-кыйыш дүйнө ошондо иргелет.
Кылымдардын кыйырына уланчу
Ырларына жашоо берет, түр берет.
Көрбөй туруп келе турган заманды,
Көрбөй туруп төрөлө элек балаңды,
Айтып коëт жүз жылдардан арыраак
Биз билбеген булуң-бурчун караңгы.
Жашоо-турмуш, жондо жүгүң оордо
Ана ошондой акын керек доорго.
Аргымактай чуркай берет баш чулгуп
Акыл эсти чаап турса зоорго.
Байлык үчүн падышага жалданбас,
Аял затка, асыл затка алданбас.
Олуя акын, ойчул акын дегениң
Пайгамбардан, кудайдан да жалтанбас.
Ар бир доордун акындары ар башка,
Түшөт алар дүнүйөлүк кармашка.
Жердин эмес, аалам жүгүн көтөргөн
Акын гана жеңип чыгат кармашта.
Ойчул акын ошон үчүн акын да,
Сөздөрү да куюлушкан асыл баа.
Биздин күндүн, биздин доордун адамы
Суусап турат дал ошондой акынга.
