Көзүңдү алчы
Ток ургандай денемди көз ирмемим,
Токтоп туйдум бир нерсе сезилгенин.
Мээлеп турган экен оов, жалт карасам,
Мергенчинин көзүндөй көзүң сенин.
Көңүлүмдү табышмак сезим басат,
Көздөрүңдөн аткан ок көзүмдү ачат...
Мени сенден кызганган жолдон өтүп,
Мергенчинин көзүндөй көзүң катат.
Адат кылба, жанымды бөлүп жарты,
Айланбасын нөшөргө күндүн арты.
Кайып болуп кетпейин кайберендей,
Мергенчинин көзүндөй көзүңдү алчы.
Кармап алып чекитти...
Күндөр бизден күлгүндөй кезди жулуп,
Калганына караткан жолдор мына...
Бирок келсең ала кел көздү жумуп,
Кармап алып чекитти колдоруңа.
Сурабагын неге деп, баарын кечтим,
Жадап бүкүр бүтпөгөн үтүрлөрдөн.
Бүтүмүнө чекиттин таазим эттим,
Улуулуктун сездирип күчүн жеңген.
Мыйзамына мезгилдин күмөн дешпей,
Жаз жамгыры эзгендей жанчылып кар.
Сен экөөбүз турганда түгөнбөстөй,
Себеби көп карама-каршылыктар.
