Түйүлүп түйдөк жиптей көкүрөгүм,
Түшүнбөйм эмнегедир өкүнөмүн.
Сүйдүм сени, жолдоштукка тандадым,
Сөз айталбай бир топ мезгил жандадым.
Тырмап ойлор көкүрөктү тарактай,
Туталанам тытылган бир барактай.
Асыл ойлор баш багып айланаман,
Аруулукка жанашсам АЙГА барам.
Удургуп түркүн ойлор каптайт улам,
Ушундай "кең ааламга” батпай турам.
Издебедим бак-таалайды базардан,
Издебедим ыйык жайдан, мазардан.
Ыр жазып кыялдардын учагында,
"Ысык ой” тыбырчылайт кучагымда.
Секирем бийиктикке термелип мен,
Себебин билесиңби эмнеликтен?
Эмнегедир коркунуч басат мени,
Ээн баш ойлор алкымдан асат мени.
